إيه المشكلة أما تجيلي ونروح قاعدين ع
رصيف الشارع .. ونحكي فى كلام كتير
تفاصيله محدش هيفهما غيرنا.. وخصوصاً فى الجو ده
هحكيلك ع كل الحاجات اللي خلتني موجوعة
وخايفة أقرب من الناس،حتى أنت!
وأنت تحاول تقنعني أن الحياة حلوة وأنا بس اللي قفشة على روحي وبحملها فوق طاقتي وأكتر شوية..
وتطبطب عليا بعينيك من غير ما أنت نفسك تحس
وتفهمني أني لازم أحب نفسي بكل حاجة فيها،وأنا أفضل أقولك أن الموضوع بالنسبة ليا أكبر من كده بكتير
وأني كل لما بتصالح مع نفسي ،بتحصل حاجة تخليني تايهة من تاني..
وأني سهلة الكسر بسرعة،ومش عارفة بصراحة أنا بداوي نفسي إزاي،ولا حتى إذا كنت بلحق!
ولا ليه أقل الحاجات لما بتخبطني بقوم واقعة ع طول
من غير ما ألحق نفسي وأنا بتكعبل!
وبعدين تبدأ تحكيلي عن كل الحاجات اللي مريت وعديت بيها،وعن أحلامك وإزاي بتفكر توصلها..
وإزاي أنت على قد مابتتهز من جواك ساعات إلا أنك بتفضل مكمل
وأن أحنا قد إيه شبه بعض وأرواحنا واحدة ،رغم أننا مختلفين!
وهفهمك أن ده سبب كبير فى محاولتي القليلة اللي بحارب فيها نفسي عشان أتقدم خطوة،وأقربلك..
وأني عندي فوبيا من القرب الزيادة.. أو محاولة القرب أصلاً.
وفى الأخر هقولك أني من أكتر الناس المحظوظين
عشان عرفتك وقعدنا سوا على الرصيف.
